Mariing kinokondena ng Migrante Netherlands ang mga panukalang batas na Asylum Emergency Measures Act at ang Two-status system na nakatakdang pagbotohan sa Senado ng Netherlands bukas April 21. Ang mga panukalang ito ay lalong magpapahirap sa kalagayan ng mga migranteng Pilipino na nangangailangan ng proteksyon at seguridad.
Kung maipapasa, maaaring alisin ang permanenteng residency, gawing pansamantala ang pananatili ng mga refugee, at higpitan pa ang karapatan sa family reunification. Ito ay mga hakbang na tahasang umaatake sa batayang karapatang pantao ng mga migrante at refugees.
Kasabay nito, itinutulak din ng European Union ang mas mahigpit pang mga patakaran sa migrasyon sa pamamagitan ng EU Migration and Asylum Pact at ng EU Return Regulation. Sa ilalim ng mga EU laws na ito, paiigtingin ang border controls, palalawakin ang detensyon ng mga migranteng walang dokumento, pabibilisin ang deportation process, at gagawing mas madali para sa mga estado ang pagpapatapon sa mga migranteng nabigong makakuha ng legal na status papunta sa tinatawag na mga “return hubs” o detention centers sa labas ng EU. Sa pamamagitan ng EU Return Regulation, lalo pang pinalalakas ang koordinasyon ng mga EU member states sa sapilitang deportasyon ng mga migrante, habang binabawasan ang pagkakataon nilang mag-apela o maghanap ng proteksyon.
Ang mga hakbang na ito ay bahagi ng lumalawak na anti-migranteng pulitika sa buong Europa. Sa mga nakaraang dekada, sistematikong isinisisi sa mga migrante ang mga problemang pang-ekonomiya tulad ng kakulangan sa pabahay, mababang sahod, krisis sa serbisyong panlipunan, at lumalalang kawalan ng trabaho. Sa halip na akuin ang pananagutan sa mga neoliberal na patakaran na nagpalala sa kahirapan at kawalan ng seguridad, itinuturo ng mga naghaharing uri ang mga migrante bilang sanhi ng krisis.
Ngunit ang totoo, ang paglala ng kahirapan at kawalang-katiyakan sa buhay ay sintomas ng isang sistemang pang-ekonomiya na nasa malalim na krisis. Habang patuloy na pinoprotektahan ang tubo ng malalaking korporasyon at mayayamang indibidwal, ipinapasa sa mamamayan (Dutch man o migrante) ang bigat ng austerity, privatization, at deregulasyon. Sa ganitong kalagayan, ginagamit ang rasismo at anti-migrante na propaganda upang pag-awayin ang mga manggagawa at ilihis ang galit ng mamamayan mula sa tunay na ugat ng krisis.
Pinakamatinding tatamaan ng mga batas na ito ang mga undocumented na migrante. Sa ilalim ng mas mahigpit na deportation measures at pinaigting na border enforcement, mas lalong ilalagay sa alanganin ang kanilang kaligtasan, kabuhayan, at dignidad. Ang takot sa pagkakadakip at deportasyon ay magtutulak sa marami na manatiling nakatago, umiwas sa mga awtoridad, at magtiis sa mapang-abusong kalagayan sa trabaho at tirahan. Sa halip na proteksyon, mas marami pang migrante ang mapipilitang mamuhay sa delikadong mga kalagayan.
Dahil sa mas mababang proteksyon sa ilalim ng mga bagong regulasyon, mas magiging bulnerable ang mga undocumented na migrante sa labor exploitation, human trafficking, at iba pang anyo ng pang-aabuso. Marami sa kanila ang nagtatrabaho sa mahihirap at mababang sahod na trabaho na iniiwasan ng iba, ngunit sila rin ang unang pinagkakaitan ng karapatan at proteksyon. Ang mga bagong batas na ito ay lalo lamang magpapalalim sa kanilang pagiging bulnerable habang patuloy silang ginagamit bilang murang lakas-paggawa sa Netherlands at buong Europa.
Mariin din naming kinokondena ang kawalang aksyon ng mga embahada ng Pilipinas sa harap ng lumalalang mga patakarang anti-migrante sa Europa. Sa halip na aktibong ipagtanggol ang karapatan at kapakanan ng milyun-milyong Pilipinong nasa ibayong dagat, patuloy nitong inuuna ang labor export policy at diplomatikong pakikipag-ugnayan na nakatuon sa pagpapanatili ng daloy ng remittances kaysa sa tunay na proteksyon ng mga migrante. Ang ganitong tindig ay nag-iiwan sa mga Pilipinong migrante, lalo na ang undocumented, na lalong bulnerable sa pang-aabuso, diskriminasyon, at deportasyon, nang walang sapat na suporta mula sa sariling gobyerno.
Nanawagan ang Migrante Netherlands sa lahat ng Pilipinong migrante, documented man o undocumented, gayundin sa lahat ng migranteng komunidad, mga manggagawa, at mga mamamayang Dutch, na magkaisa at tutulan ang mga mapaniil na batas na ito. Hindi lamang ito laban sa mga asylum seekers o undocumented migrants, ito ay pag-atake sa karapatan at dignidad ng lahat ng manggagawa at mamamayan.
Nanawagan kami na ibasura ang mga mapanupil at anti-migranteng mga batas sa Netherlands (Asylum Emergency Measures Act at Two-status system). Mahigpit naming tinututulan ang EU Return Regulation at iba pang mga patakarang ikikriminalisa ang mga undocumented na migrante. Patuloy ang aming panawagan na igalang ang karapatan at tiyakin ang dignidad ng lahat ng migrante, may papel man o wala.
Sa harap ng tumitinding panunupil, lalong kinakailangan ang sama-samang pagkilos ng mga migranteng Pilipino sa Netherlands at sa buong Europa. Tanging sa pagkakaisa ng mga migrante at mamamayan mapipigilan ang mga patakarang naghahasik ng takot at diskriminasyon.
ASYLUM EMERGENCY MEASURES ACT, IBASURA!
TWO-STATUS SYSTEM ACT, IBASURA!
EU RETURN REGULATION, LABANAN!
PROTEKSYON HINDI DEPORTASYON!
